घरात घरगड्यांची फौज, तरीही स्वतः शेतात राबून शेतीतून साधली किमया; मासोळी, भातपीक अन् दुग्ध व्यवसायातून व्यावसायिक क्रांती
- घरची परिस्थिती सधन.... बसलेल्या जागेवर एका आवाजात पाहिजे असलेली वस्तू देण्यासाठी धावणारी घरगड्यांची फौज.... हे सर्व असताना, भंडाऱ्याच्या साकोली येथील सरिता फुंडे या स्वतः शेतात राबतात. दोन-चार एकर नाही तर, तब्बल २१ एकर शेतात त्यांनी कृषी विभागाच्या मार्गदर्शनातं कायापालट करीत पारंपरिक पिकांना फाटा देत, शेतात बागायतीचा आधुनिक प्रयोग केला आहे. यातून त्यांनी आर्थिक प्रगती तर साधलीचं....मात्र, समाजातील इतर महिलावर्गांनाही शेतीकडं वळण्याचा सल्ला दिला आहे.
सरिता फुंडे या आहेत भंडाऱ्याचे राष्ट्रवादी काँग्रेसचे दिग्गज नेते सहकार महर्षी सुनील फुंडे यांच्या सौभाग्यवती. विवाहानंतर सर्व सुख समृध्दी आणि वातानुकूलीन जीवन मिळालं असलं तरी सरिता या शेतकरी कुटुंबात जन्माला आल्याने त्यांची सर्वसामान्यांशी नेहमी नाळ जोडलेली आहे. बिरादरी या संस्थेच्या माध्यमातून त्यांनी नेहमी सर्वसामान्य नागरिकांना मदतीचा हात देण्यासाठी पुढाकार घेतलाय.
अशा स्वभावाच्या सरिता फुंडे या शेतातील कुठलंही काम असो, शेतात भातपिकांची लागवड असो की, बागायती शेतातील लागवड स्वतः साडीचा पदर कंबरेला खोचून त्या शाश्र्वत शेती करतात. ही शेती करताना कुठल्याही रासायनिक खतांचा वापर न करता त्या नैसर्गिक शेती करतात. यासाठी त्या शेतातचं गांडूळ खत, दशपर्णी अर्क तयार करतात आणि त्याचा वापर बागायती पिकांच्या संरक्षणासाठी करतात.
मागील ८ वर्षांपासून त्या शेतीत गुंतल्या असून, वर्षाला लाखो रुपयांचं आर्थिक उत्पादन घेतात. इतर महिलांनी शेतीकडे वळून प्रगती साधावी, असं त्यांनी आवाहन केले आहे. शेतात फिशटॅंक मधून निघणाऱ्या मासोळ्या असो की, ॲपल बोर, टरबूज, टोमॅटो, फणस, चवळी, ढेमसं, कारली, केळी, लिंबू, मका, भातपीक या बागायतीचं उत्पादन घेतात. त्यांच्याकडे फिशटॅंकमध्ये पांढरा, निळसर, गुलाबी, फिक्कट गुलाबी, गर्द लाल प्रकारच्या कमळाचे उत्पादन घेतात.
यासोबत दुग्ध व्यवसायातून त्यांनी धवल क्रांती केली आहे.
लोक संदेश न्यूज मीडिया प्रायव्हेट लिमिटेड मुंबई/ सांगली
